Ugadi festival in Telugu

 ఉగాది:

ఉత్తరాయణం—వసంత ఋతువు—చైత్ర మాసము—శుక్ల పక్షము — పాడ్యమి.

మన మొట్టమొదటి పండగ ఉగాది. ఇది ఉత్తరాయణములో వసంత ఋతువు, చైత్ర మాసము, శుక్ల పక్షము,  పాడ్యమి తిథినాడు వస్తుంది. దీని ఉద్దేశ్యము ఈ దినమునుండి

‘పతంజలి అష్టాంగయోగమును ప్రారంభము చేద్దాము. జన్మను సార్థకము చేసికుందాము’  అని సంకల్పము చేసికొనుటయే.  

పతంజలి అష్టాంగయోగము:

1)యమ: అహింస, సత్యం,ఆస్తేయం (దొంగతనముచేయకుండుట), బ్రహ్మచర్యం అనగా బ్రహ్మజ్ఞానమార్గములో నడచుట, అపరిగ్రహం (ఇతరులనుండి ఏమీ ఆశించకుండుట) 

 2)నియమ: సౌచం (శరీర, మనస్సుల శుభ్రత), సంతోషం, తృప్తి, స్వాధ్యాయము లేదా శాస్త్రపఠనం అనగా శ్వాసను అస్త్రముగా చదువుట, మరియు ఈశ్వరప్రణిధానము అనగా పరమాత్మకు అంకితమగుట. 

3)ఆసన: స్థిరత్వము అనగా సాధనచేయు సమయములో ఆసనములో స్థిరముగా నుండుట 

4)ప్రాణాయామ: శ్వాస నియంత్రణ

5)ప్రత్యాహార: ఇంద్రియవిషయములను ఉపసంహరించుకొనుట.     

6)ధారణ: వస్తు ఏకాగ్రత అనగా ధ్యేయము మీద ఏకాగ్రత 

7)ధ్యాన: కేవలము పరమాత్మపై ఏకాగ్రత.

8)సమాధి: సమ అధి అనగా పరమాత్మతో ఐక్యమగుట.

ధారణ, ధ్యాన మరియు సమాధి, మూడింటినీ కలిపి సమ్యక్ సమాధి అంటారు. 

ధ్యానము బీజముతో మొదలయ్యి నిర్బీజం అవ్వాలి.    

      

పశ్యన్ శృణ్వన్ స్పృశన్ జిఘ్రన్ అశ్నన్ గచ్ఛన్

స్వపన్ శ్వసన్ ప్రలపన్ విసృజన్ గృహ్ణన్ ఉన్మిషన్           గీత 5—9 

సాధకుడు చూస్తున్నను వినుచున్నను తాకుచున్నను వాసన చూస్తున్నను తినుచున్నను నడచుచున్నను నిదురించుచున్నను ఊపిరి విడుచుచున్నను మాట్లాడుచున్నను గ్రహించుచున్నను కండ్లను తెఱచుచున్నను మూయుచున్నను ఇంద్రియములు వాటివాటి పనులు అవి చేసికుంటున్నవని నిర్లిప్తతో కర్తృత్వ బుద్ధిలేకుండ ఉండును. 

తపస్విభ్యోధికోయోగీజ్ఞానిభ్యోపిమతోధికః

కర్మిభ్యశ్చాధికోయోగీతస్మాత్యోగీభవార్జున.                               గీత 6—46 

యోగి కృచ్ఛ్ర చాంద్రాయణాది తపస్సులు చేయు వారికంటెను, శాస్త్ర జ్ఞానము కలవారికంటెను అగ్ని హోత్రాది కర్మలు చేయు వారికంటెనుశ్రేష్ఠుడు. 

ఇంజనీరింగు చదువు చదివి కరెంటు పోతే ఫ్యూజు వేయలేకపోతే ఆ చదువు ఎంత వ్యర్థమో అదే విధముగా లక్ష్యము యొక్క పరాకాష్ఠ అయిన జీవ బ్రహ్మైక్య జ్ఞానము కలిగించనివన్నీ వ్యర్థమే 

 

అపానేజుహ్వతిప్రాణంప్రాణేపానంతథాపరే

ప్రాణాపానగతీరుధ్వాప్రాణాయామపరాయణాః           గీత   4—29

కొందరు సాధకులు ప్రాణాపాన గతులను లేదా మార్గములను నిరోధించి ప్రాణమును అపానములో అపానమును ప్రాణములో హోమము చేయుచూ మనో స్థిరత్వము పొంది తద్వారా జీవ బ్రహ్మైక్యమును పొందుచున్నారు.

అపరేనియతాహారాఃప్రాణాన్ప్రాణేషుజుహ్వతి........         గీత   4—30 

కొందరు సాధకులు ఆహార నియమములను పాటిస్తూ మితాహారులై ప్రాణశక్తిని ప్రాణశక్తియందే హోమము చేస్తున్నారు. అనగా కర్మేంద్రియ వ్యాపారములైన గమనశక్తి విసర్జనాశక్తి మొదలగునవి మరియు జ్ఞానేంద్రియ వ్యాపారములైన శ్రవణశక్తి వాసనాశక్తి చూసేశక్తి మొదలగునవి నిరోధించి మనోస్థిరత్వము పొంది తద్వారా జీవ బ్రహ్మైక్యమును పొందుచున్నారు.

Prem & Om

K.M.Sastry